Fjárlagafrumvarp ársins 2018 lagt fram á Alþingi
Fjárlagafrumvarp fyrir árið 2018 hefur verið lagt fram á Alþingi. Samkvæmt frumvarpinu er gert ráð fyrir að fjárheimildir Kvikmyndamiðstöðvar Íslands (KMÍ) muni nema 1.130,4 m.kr. á árinu 2018, sem skiptast á milli rekstrarliðar KMÍ og Kvikmyndasjóðs. Framlag til Kvikmyndasjóðs hækkar um 80 m.kr. frá fyrra ári í samræmi við samkomulag um stefnumörkun fyrir íslenska kvikmyndagerð milli stjórnvalda og hagsmunaaðila. Samkvæmt samkomulaginu og texta fjárlagafrumvarps er gert ráð fyrir að sjóðurinn hækki um 90 m.kr. milli áranna 2018 og 2019.
Framlag ríkisins til starfsemi KMÍ hækkar um 3,9 m.kr. þar sem hækkunin skýrist af verðbótareikningi á launakostnað stofnunarinnar.
Tafla 1 gefur yfirlit yfir þróun fjárheimilda Kvikmyndamiðstöðvar síðustu fimm ár.
| Tafla 1: Fjárheimildir KMÍ 2012-2017 skv. fjárlögum og 2018 skv. fjárlagafrumvarpi | |||||
| Fjárhæðir í m.kr. | |||||
| Kvikmyndamiðstöð Íslands | 2014 | 2015 | 2016 | 2017 | 2018* |
| Kvikmyndamiðstöð Íslands | 131,2 | 121,7 | 132,1 | 139,9 | 152,1 |
| Sértekjur Kvikmyndamiðstöðvar | -10,4 | -7,8 | -8,0 | -8,1 | -16,4 |
| Framlag til rekstrar KMÍ | 120,8 | 113,9 | 124,1 | 131,8 | 135,7 |
| Framlag til Kvikmyndasjóðs | 624,7 | 774,7 | 844,7 | 914,7 | 994,7 |
| Rekstrarheimild KMÍ samtals | 745,5 | 888,6 | 968,8 | 1.046,5 | 1.130,4 |
| * Fjárhæðir 2018 eru skv. frumvarpi til fjárlaga | |||||
Í samræmi við samkomulag um stefnumörkun í kvikmyndagerð skiptast framlög í sjóðinn milli þriggja sjóðshluta byggt á tegund kvikmyndaverka. Þar kemur fram að 65% úthlutana sjóðsins skuli varið til leikinna kvikmynda, 18% til leikins sjónvarpsefnis og 17% til heimildamynda.
Hækkun framlaga í Kvikmyndasjóð um 80 m.kr. á árinu 2018 myndi skila sér í auknu bolmagni sjóðsins til að styrkja leiknar kvikmyndir um 57 m.kr., leikið sjónvarpsefni um 16 m.kr. og heimildamyndir um 15 m.kr.
Tafla 2 sýnir áætlaða skiptingu úthlutana Kvikmyndasjóðs fyrir sjóðshluta fyrir árin 2018 og 2019 miðað við áætlaða hækkun og sömu skiptingu fyrir árið 2016 og 2017 til samanburðar.
| Tafla 2: Úthlutun skipt í sjóðshluta skv. samkomulagi um kvikmyndagerð | |||||
| Fjárhæðir í m.kr. | |||||
| % | 2016 | 2017 | 2018 | 2019 | |
| Leiknar kvikmyndir | 65% | 507 | 547 | 600 | 657 |
| Leikið sjónvarpsefni | 18% | 140 | 152 | 166 | 182 |
| Heimildamyndir | 17% | 132 | 143 | 156 | 172 |
| Samtals til úthlutunar | 779 | 842 | 922 | 1.011 | |
Þess ber að geta að hluti fjárveitinga til Kvikmyndasjóðs kemur ekki til úthlutana í formi styrkja. Þar má nefna að í samkomulagi um stefnumörkun í kvikmyndagerð fyrir árin 2017 til 2019 eru 40 m.kr. eyrnamerktar öðrum þáttum tengdum endurskoðun laga o.fl. auk þess sem sjóðurinn fjármagnar aðild að alþjóðlegu samstarfi og launalið kvikmyndaráðgjafa.