FRÉTTIR
KVIKMYNDAMIDSTÖÐ ÍSLANDS Í CANNES 2008
Kvikmyndahátíðin í Cannes verður haldin dagana 14. – 25. maí n.k. Íslenska stuttmyndin Smáfuglar (2 Birds) eftir Rúnar Rúnarsson hefur verið valin í aðalkeppni hátíðarinnar og keppir því um Gullpálmann í ár. Þetta er í annað sinn sem íslensk stuttmynd er valin til keppni í Cannes, en árið 1993 keppti stuttmynd Ingu Lísu Middleton, Ævintýri á okkar tímum, um Gullpálmann. Verðlaunaafhendingin fer fram sunnudaginn 25. maí, en þá er lokahóf kvikmyndahátíðarinnar.
Samhliða kvikmyndahátíðinni er í Cannes mjög öflugur kvikmyndamarkaður þar sem kaupendur og seljendur kvikmynda alls staðar að úr heiminum koma saman. Fimm íslenskar kvikmyndir verða sýndar að þessu sinni á markaðssýningum í Cannes en það eru Astrópía (Gunnar B. Guðmundsson), Duggholufólkið (Ari Kristinsson) , Veðramót (Guðný Halldórsdóttir), The Amazing Truth About Queen Raquela (Ólafur De Fleur Jóhannesson) og Skrapp út (Sólveig Anspach). Tvær síðastnefndu myndirnar hafa enn ekki verið sýndar á Íslandi.
Magnús Viðar Sigurðsson verður fulltrúi Íslendinga í “Producer on the move”, en það er viðburður þar sem framleiðendur alls staðar að úr Evrópu koma saman og kynna sig og myndir sínar, ræða framtíðarverkefni og vinna að því að fá nýja aðila að verkum sínum.
Fulltrúar Kvikmyndamiðstöðvar Íslands á kvikmyndahátíðinni í Cannes eru:
Laufey Guðjónsdóttir, forstöðumaður KMÍ. Sími 820 4967
Sigurrós Hilmarsdóttir, fjármálastjóri KMÍ. Sími 661 7551
Christof Wehmeier, kynningarfulltrúi KMÍ. Sími 662 6066