FRÉTTIR
GNARR Á TRIBECA OG HOT DOCS, ÓRÓI Á SPROCKETS OG SUMARLANDIÐ Á CPH PIX
Heimildamyndin Gnarr eftir Gauk Úlfarsson er að vekja eftirtekt erlendis og verður sýnd á tveimur virtum kvikmyndahátíðum í Norður-Ameríku í apríl og maí. Um er að ræða Tribeca kvikmyndahátíðina sem fram fer í New York dagana 20. apríl – 1. maí og heimildamyndahátíðina Hot Docs sem fram fer í Toronto dagana 28. apríl – 8. maí.
Gnarr er ekki eina íslenska myndin á Tribeca því stuttmyndin Þyngdarafl eftir Loga Hilmarsson verður einnig sýnd á hátíðinni og það í keppni (Shorts in Competition: Narrative).
Af ungum leikstjórum með sínar fyrstu kvikmyndir í fullri lengd er það að frétta að Órói, kvikmynd Baldvins Z, var nýverið sýnd við góðar undirtektir á barna- og unglingamyndahátíðinni Sprockets í Kanada. Þá verður Sumarlandið, eftir Grím Hákonarson, sýnd á CPH Pix kvikmyndahátíðinni sem fram fer í Kaupmannahöfn 14. apríl -1. maí.
Upplýsingar um þátttöku íslenskra kvikmynda á hátíðum og öðrum viðburðum má finna hérna.