FRÉTTIR
Á ANNAN VEG VERÐLAUNUÐ Í LŰBECK
Kvikmyndin Á annan veg eftir Hafstein Gunnar Sigurðsson hlaut Eystrasaltsverðlaunin (Baltic Film Prize) á norrænu kvikmyndahátíðinni í Lübeck í Þýskalandi. Þetta er í 20. sinn sem verðlaunin eru veitt og hafa kvikmyndaleikstjórar á borð við Lars von Trier, Susanne Bier og Friðrik Þór Friðriksson áður veitt þeim viðtöku.
Alls voru 10 íslenskar myndir sýndar á hátíðinni, þar af þrjár í aðalkeppni hátíðarinnar – Á annan veg, Brim og Eldfjall. Þess má til gamans geta að Sveppi og Bragi Þór Hinriksson höfðu verið fengnir til að afhenda Eystrasaltsverðlaunin og veittu Hafsteinn Gunnar Sigurðsson, Davíð Óskar Ólafsson og Arni Filippusson þeim viðtöku.
Á annan veg er að hljóta góðar viðtökur erlendis, en auk ofangreindra verðlauna þá birtist nýverið mjög jákvæð gagnrýni um myndina í Variety. Þá verður Á annan veg sýnd á fjölda kvikmyndahátíða næstunni, til dæmis á kvikmyndahátíðinni í Thessaloniki á Grikklandi, hún verður opnunarmynd kvikmyndhátíðarinnar í Tallinn og í lok nóvember tekur hún þátt í aðalkeppni kvikmyndahátíðarinnar í Torino á Ítalíu.