Börkur Sigþórsson leikstýrir þáttaröðinni Baptiste fyrir BBC

Börkur Sigþórsson mun leikstýra þremur þáttum af sex fyrir bresku spennuþáttaröðina Baptiste, sem kemur úr smiðju BBC. Þáttaröðin, sem er afleggjari (e. spin-off) af hinni vinsælu þáttaröð BBC The Missing, er nú í þróun og mun fara í tökur síðar á þessu ári í Hollandi og Belgíu.

Nóg er um að vera hjá Berki um þessar mundir. Fyrsta kvikmynd hans í fullri lengd, Vargur, verður frumsýnd hérlendis þann 4. maí og er hann einn af leikstjórum annarrar seríu af Ófærð, sem er nú í tökum og áætlað er að frumsýna í haust á þessu ári. Þar mun hann leikstýra fjórum af 10 þáttum. Áður hafði hann leikstýrt tveimur af tíu þáttum fyrstu seríu Ófærðar. Auk þess leikstýrði hann á síðasta ári einum þætti í bresku þáttaröðinni Endeavour.