Fimm íslenskar kvikmyndir í keppni Nordisk Panorama
Fimm íslenskar heimilda- og stutmyndir keppa um verðlaun á Nordisk Panorama, sem fer fram í Malmö í Svíþjóð 21.-26. september.
Opnunarmynd hátíðarinnar er stuttmynd Gunnar Martinsdóttur Schlüter, Fár, ásamt sænsku heimildamyndinni Miraklet i Gullspång eftir Mariu Fredriksson.
Eftirtaldar myndir frá Íslandi taka þátt í hátíðinni í ár.
Besta norræna heimildamyndin
Soviet Barbara, sagan um Ragnar Kjartansson í Moskvu
Leikstjórn: Gaukur Úlfarsson
Árið 1992, viku eftir fall Sovétríkjanna, varð sápuóperan Santa Barbara eins konar gluggi rússneskra sjónvarpsáhorfenda inn í vestræna lifnarðarhætti og naut gríðarlegra vinsælda. Þrjátíu árum síðar færir íslenskur myndlistarmaður, Ragnar Kjartansson, Rússum þættina á ný.
Heimaleikurinn
Leikstjórn: Smári Gunnarsson og Logi Sigursveinsson
Heimaleikurinn er gamansöm íþróttaheimildamynd um tilraun manns til að uppfylla draum föður síns; að safna í lið heimamanna til að spila langþráðan vígsluleik á fótboltavelli sem faðirinn lét byggja á Hellissandi 25 árum áður.
Besta norræna stuttmyndin
Fár
Leikstjórn: Gunnur Martinsdóttir Schlüter
Einstaklingur tekst á við aðstæður sem reyna á siðferði mannskepnunnar í aftengdum heimi við náttúruna.
Nýjar norrænar raddir (New Nordic Voices)
Þegar trén koma
Leikstjórn Berglind Þrastardóttir
Þar sem trén vaxa í berangrinu á Íslandi, fara orðrómar á flug á milli trjánna um að varúlfarnir séu að snúa aftur.
Ungnorræn (Young Nordic)
Sætur
Leikstjórn Anna Karín Lárusdóttir
Hinn 11 ára Breki verður sífellt fyrir barðinu á stóru systur sinni Bergdísi, en hann þráir ekkert heitar en viðurkenningu frá henni. Dag einn þegar Breki er einn heima, stelst hann í föt og make-up systur sinnar og skilur herbegið eftir í rúst. Þegar fjölskyldan kemur óvænt heim, tekur við atburðarás sem leiðir til löngu tímabærs uppgjörs milli systkinana.