Góði hirðirinn og Humarsúpa valdar til þátttöku á Visions du Réel heimildamyndahátíðinni
Heimildamyndirnar Góði hirðirinn eftir Helgu Rakel Rafnsdóttur og Humarsúpa eftir Rafa Molés og Pepe Andreu hafa verið valdar til þátttöku á heimildamyndahátíðinni Visions du Réel, sem fer fram dagana 15. - 25. apríl í stafrænu formi.
Góði hirðirinn verður frumsýnd alþjóðlega á hátíðinni undir flokknum „International Medium Length & Short Film“. Helga Rakel Rafnsdóttir er leikstjóri og handritshöfundur myndarinnar, og er hún jafnframt framleiðandi hennar fyrir framleiðslufyrirtækið Skarkali.
Á landi Þorbjörns Steingrímssonar við Ísafjarðardjúp eru hátt í 600 bílhræ. Góði hirðirinn veltir upp spurningum um manneskjuna, umhverfi og fagurfræði. Myndin er sería af lifandi póstkortum frá afskekktum stað sem sumir sjá sem ævintýraland á meðan aðrir býsnast yfir draslinu.
Með alþjóðlega sölu og dreifingu Góða hirðisins fer RainaFilm Festival Distribution.
Humarsúpa mun vera sýnd á hátíðinni undir flokknum „Grand Angle“. Myndin er spænsk/íslensk/litháísk samframleiðsla og er leikstýrt af Rafa Molés og Pepe Andreu og skrifuð af Rafa Molés, PepeAndreu, Ólafi Rögnvaldssyni og Arunas Matelis.
Humarsúpa segir frá litla veitingastaðnum á bryggjunni sem er sálin í þorpinu, athvarf gamalla sjómanna, músíkanta og menningarvita. Þegar erlendir ferðamenn uppgötva staðinn og streyma að til að upplifa stemninguna, kaupa fjárfestar reksturinn og færa út kvíarnar. Þá er spurning hvort sálin í Bryggjunni fylgi með.
Með alþjóðlega sölu og dreifingu fer Wide.