Skjaldborg opnar fyrir umsóknir
Skjaldborg - hátíð íslenskra heimildamynda verður haldin á Patreksfirði um hvítasunnuhelgina 17.-20. maí. Opnað hefur verið fyrir umsóknir fyrir verk til frumsýningar og verk í vinnslu til kynningar á hátíðinni. Fyrri umsóknarfrestur er 23. febrúar 2024 og seinni þann 15. mars 2024. Umsóknarform er aðgengilegt á vef hátíðarinnar.
Vakin er athygli á því að hægt er að sækja um með hlekkjum á myndir á eftirvinnslustigi með nýjustu útgáfu verksins auk lýsingar á því hvar verkið er statt og áætlun um verklok í athugasemdum. Vakin er athygli á að skila þarf verkum í endanlegri mynd í tæka tíð fyrir hátíð.
Skjaldborg frumsýnir íslenskar heimildamyndir og hefur það að markmiði að styðja við íslenska heimildamyndagerð. Hægt er að sækja um í tveimur flokkum, frumsýning á heimildamynd eða verk í vinnslu.
Þær íslensku heimildamyndir sem frumsýndar eru á hátíðinni keppa um verðlaunin Einarinn, áhorfendaverðlaun sem hafa verið veitt frá upphafi, og dómnefndarverðlaunin Ljóskastarann.
Gjaldgeng til frumsýninga 2024 eru verk sem uppfylla eftirfarandi skilyrði:
- Heimildamyndir sem ekki hafa verið sýndar opinberlega á Íslandi og munu ekki verða sýndar á Íslandi áður en Skjaldborg 2024 er lokið.
- Heimildamyndir sem teljast íslensk framleiðsla.
- ATH! Hægt er að sækja um fyrir erlendar myndir sem fjalla um íslensk málefni en þær myndir eru ekki gjaldgengar í keppni.
Nánari upplýsingar á www.filmfreeway.com/Skjaldborg