Þjóðsaga eftir Guðna Líndal Benediktsson og Ævar Þór Benediktsson valin á Cinekid Script LAB
Þjóðsaga hefur verið valin á Cinekid Script LAB handritavinnustofuna. Þjóðsaga er ævintýramynd í þróun sem er byggð á metsölubókinni Þín eigin þjóðsaga eftir Ævar Þór Benediktsson. Handritshöfundar eru þeir Guðni Líndal Benediktsson og Ævar Þór Benediktsson og munu þeir báðir taka þátt í vinnustofunni.
Cinekid Script LAB eru sex mánaða þjálfunarbúðir í handritsskrifum á kvikmyndaverkefni fyrir börn. Cinekid stendur árlega fyrir Cinekid kvikmyndahátíðinni og Cinekid for Professionals ráðstefnunni, sem fara báðar fram í Amsterdam í október, með það fyrir augum að efla framleiðslu og aðgengi að hágæða barnaefni.
Alls voru 14 verkefni valin á vinnustofuna sem fer fram í Amsterdam í október og einnig í Berlín þegar Berlinale kvikmyndahátíðin fer fram í febrúar. Þátttakendum býðst aðstoð og ráðgjöf fagfólks ásamt því að kynna verkefni sín fyrir sölufulltrúum, dreifingaraðilum, innkaupastjórum og framleiðendum.
Framleiðsla myndarinnar verður í höndum framleiðslufyrirtækisins Zik Zak.