Viðbótarfjármagn til kvikmyndagerðar vegna Covid-19

Mennta- og menningarmálaráðuneytið hefur veitt aukalega 120 mkr. í kvikmyndasjóð til að mæta þeim fjárhagslegu áföllum sem listir og skapandi greinar verða fyrir vegna covid faraldursins og efla þar með fjárfestingu til framtíðar.

Stuðningurinn byggir á þingsályktun um fjárfestingarátak stjórnvalda til að vinna gegn samdrætti í hagkerfinu í kjölfar heimsfaraldursins, sem samþykkt var á Alþingi þann 30. mars sl. Mat á umsóknum og styrkir verða veittir á sama grundvellli og aðrir styrkir kvikmyndasjóðs.

Kvikmyndamiðstöð mun birta nánari upplýsingar á allra næstu dögum um umsóknarfrest og tilhögun sem mun taka mið af eftirfarandi skilyrðum sem fylgja fjárveitingunni:

Verkefnið hefjist eigi síðar en 1. september 2020 og verði lokið fyrir 1. apríl 2021.
Um sé að ræða átaksverkefni sem styðji við fjölbreytta starfsemi á sviði lista og menningar með áherslu á sköpun og virka þátttöku listamanna í menningarlífi landsmanna.
Verkefnið uppfylli grunnmarkmið fjárfestingarátaksins um að styðja við eftirspurn og atvinnu til skamms tíma með arðbærum verkefnum.
Sýnt sé fram á gildi verkefnis og mikilvægi þess fyrir landsmenn.
Styrkveiting sé til undirbúnings, þróunar og framkvæmd verkefnis.
Ítarlegar upplýsingar liggi fyrir um verkefnið, auk tímaáætlunar þess.
Ekki verða veittir styrkir til þeirra sem njóta listamannalauna í 6 mánuði eða meira árið 2020.