Volaða land tilnefnd til Film Independent Spirit Awards
Kvikmynd Hlyns Pálmasonar, Volaða land, er tilnefnd til Film Independent Spirit Awards. Tilkynnt var um tilnefningarnar 5. desember en þetta er í 39. sinn sem verðlaunahátíðin fer fram.
Volaða land er á meðal fimm kvikmynda sem tilnefndar eru í flokki erlendra kvikmynda. Aðrar myndir sem hljóta tilnefningu eru Anatomy of a Fall í leikstjórn Justine Triet, Mami Wata í leikstjórn C.J. ‘Fiery' Obasi, Tótem í leikstjórn Lilu Avilés, og The Zone of Interest í leikstjórn Jonathans Glazer.
Verðlaunahátíðin fer fram 25. febrúar 2024 og verður streymt í beinni á vef IMDb og á Youtube-rás Film Independent Spirit Awards.
Á árslistum virtra miðla og tímarita
Nú undir lok árs birta vefmiðlar og tímarit lista yfir þær kvikmyndir sem báru hæst á árinu og hefur Volaða land ratað á þónokkra.
Nefna má árslista Hollywood Reporter, Indiewire og New York Times, þar sem myndin er í 8. sæti yfir bestu myndir ársins. Einnig hefur hún ratað á lista Indiewire yfir bestu kvikmyndatöku ársins, þar sem Hlynur Pálmason og Maria von Hausswolf kvikmyndatökukona eru lofuð.
Þá ber að geta að myndin hefur verið valin til þátttöku á Palm Springs kvikmyndahátíðinni í flokki bestu erlendu kvikmynda. Hátíðin fer fram 4.-15. janúar 2024.