Umsóknir

Miðastyrkir

Umsóknarfrestur vegna kvikmynda sem sýndar voru í kvikmyndahúsum árið 2016 er til 1. júlí 2017.

Heildarfjárhæð miðastyrkja sem skiptist á milli gjaldgengra kvikmynda fyrir árið 2016 er 30 milljónir.

Kvikmyndamiðstöð Íslands hefur opnað umsóknarsíðu til að taka á móti umsóknum og umsóknargögnum. Einnig er hægt að fylla út umsóknareyðublað skriflega og skila á skrifstofu Kvikmyndamiðstöðvar Íslands, Hverfisgötu 54, 101 Reykjavík. Umsóknareyðublað til útprentunar er að finna hér.

Umsækjendur þurfa m.a. að skila inn upplýsingum um tekjur af seldum aðgöngumiðum fyrir hvert ár, kostnaðaruppgjöri sem hefur verið staðfest af endurskoðanda eða stjórn félagsins og upplýsingum um styrki sem aflað var vegna framleiðslu kvikmyndarinnar. Hafi þeim gögnum þegar verið skilað til Kvikmyndamiðstöðvar þarf ekki að skila þeim aftur. Sjá nánar um efniskröfur til umsókna í reglugerð.

Nánari leiðbeiningar um umsóknarferlið og kröfur til umsókna er að finna á umsóknarsíðu.

Nánar um miðastyrki

Miðastyrki má veita kvikmyndum á íslensku sem hafa verið frumsýndar og svo teknar til almennra sýninga í íslenskum kvikmyndahúsum á árabilinu 2012 til og með 2016. Til kvikmynda teljast þær sem eru að lágmarki 70 mínútur í sýningu.

Með kvikmynd á íslensku er átt við að frumgerð kvikmyndar sem sýnd hefur verið á almennum sýningum í kvikmyndahúsi á Íslandi sé með íslensku tali, svo nemi meira en helmingi talmáls. Talsettar eða textaðar myndir eru því ekki gjaldgengar.

Þeir sem geta sótt um miðastyrk vegna kvikmyndar eru framleiðslufyrirtæki sem bera ábyrgð á gerð og fjármögnun hennar. Sé um samframleiðsluverkefni að ræða skal umsókn lögð fram í nafni aðalframleiðanda, eða aðila sem hann veitir til þess umboð.

Meðferð umsókna um miðastyrki byggir á reglugerð nr. 450/2016 um styrki vegna sýninga á kvikmyndum á íslensku í kvikmyndahúsum hér á landi og er reglugerðin á grundvelli laga nr. 14/2016.