Breyting á kvikmyndalögum samþykkt
Frumvarp menningar- og viðskiptaráðherra um breytingu á kvikmyndalögum var samþykkt á Alþingi í gær. Breytingin staðfestir meðal annars nýjan styrkjaflokk innan Kvikmyndasjóðs til lokafjármögnunar á umfangsmiklum leiknum sjónvarpsþáttaröðum.
„Þetta er fyrsti styrkur sinnar tegundar í íslenskri kvikmyndagerð og talar beint inn í kvikmyndagerð sem viðskiptagrein og listgrein. Með þessum nýja styrkjaflokki er mögulegt að fjármagna síðustu 15-20 % í framleiðslu á stórum leiknum sjónvarpsþáttum og fá hluta styrksins aftur inn til Kvikmyndasjóðs, skili verkefnið hagnaði samkvæmt settum viðmiðum styrksins,“ segir Lilja Dögg Alfreðsdóttir, menningar- og viðskiptaráðherra. Nái sjónvarpsþáttaröð ekki skilgreindu hagnaðarmarki virkjast krafa um endurheimt ekki og styrkurinn er þá án skuldbindinga um endurheimt.
Nýja styrktarflokknum er ætlað að koma til móts við örari takt í þróunar- og fjármögnunarferli verkefna og gera íslenska sjónvarpsþáttaframleiðslu samkeppnishæfari í alþjóðlegu umhverfi.
Tilkynningu Menningar- og viðskiptaráðuneytis má lesa í heild á vef Stjórnarráðsins.