Framlög til Kvikmyndamiðstöðvar árið 2019
Fjárlög fyrir árið 2019 hafa verið samþykkt af Alþingi, sem tiltaka fjárheimildir Kvikmyndasjóðs og til starfsemi Kvikmyndamiðstöðvar Íslands (KMÍ) á árinu.
Fjárheimildir Kvikmyndasjóðs nema 1.074.800 kr. á árinu 2019 og hækka um 80,1 m.kr. frá fyrra ári í samræmi við samkomulag um stefnumörkun fyrir íslenska kvikmyndagerð frá 2016 til 2019 milli stjórnvalda og hagsmunaaðila, sem tiltekur bæði fjárveitingar til Kvikmyndasjóðs, skiptingu fjárheimilda í sjóðshluta og helstu áherslur í starfi KMÍ og sjóðsins.
Tafla 1 sýnir þróun fjárframlaga til Kvikmyndasjóðs frá árunum 2013 til 2018
| Tafla 1: Framlag til Kvikmyndasjóðs 2013-2018 | Fjárhæðir í m.kr. | ||||||
| 2013 | 2014 | 2015 | 2016 | 2017 | 2018 | 2019 | |
| Framlag til Kvikmyndasjóðs | 1.020,0 | 624,7 | 774,7 | 844,7 | 914,7 | 994,7 | 1.074,8 |
| Breyting f.f.á. | -395,3 | 150 | 70 | 70 | 80 | 80,1 | |
Samkomulag um stefnumörkun fyrir kvikmyndagerð tilgreinir að úthlutunum Kvikmyndasjóðs skuli skipt milli þriggja sjóðshluta byggt á tegund kvikmyndaverka með fastri hlutfallsskiptingu. Þar kemur fram að 65% úthlutana sjóðsins skuli varið til leikinna kvikmynda, 18% til leikins sjónvarpsefnis og 17% til heimildamynda.
Samkomulagið tiltekur að milli áranna 2018 og 2019 skuli framlag ríkisins til Kvikmyndasjóðs hækka um 90 milljónir króna. Í texta fjárlagafrumvarps er tiltekið að fjárheimild málaflokksins sé aukin um 90 m.kr. til samræmis við samning.
Skýringin á því að sjóðurinn hækkar aðeins um 80,1 m.kr. er sú að til viðbótar er gerð aðhaldskrafa upp á 9,9 m.kr. á sjóðinn sem þýðir að tilgreind aukning fjárheimilda rennur ekki óskipt til sjóðsins, heldur fer hluti hennar til að mæta aðhaldskröfu um samdrátt í ríkisútgjöldum.