Umsóknir

Endurgreiðsla vegna kvikmyndagerðar

Framleiðendur kvikmynda eða sjónvarpsefnis á Íslandi eiga kost á 25% endurgreiðslum af framleiðslukostnaði sem fellur til hér á landi, eða 35% að tilteknum skilyrðum uppfylltum.
Skilyrði er að viðkomandi framleiðsla sé til þess fallin að koma íslenskri menningu á framfæri, kynna sögu lands eða náttúru eða að viðkomandi framleiðsla sé til þess fallin að stuðla að aukinni reynslu, þekkingu á listrænum metnaði þeirra sem að framleiðslunni standa.
Endurgreiðslur standa bæði innlendum og erlendum aðilum til boða, að ákveðnum skilyrðum uppfylltum. Hafi meira en 80% af framleiðslukostnaði fallið til hérlendis er endurgreiðsluhlutfall jafnframt reiknað af þeim framleiðslukostnaði sem fellur til á hinu evrópska efnahagssvæði, Grænlandi og Færeyjum. Þetta á við um framleiðslu kvikmynda, heimildamynda og sjónvarpsþátta.
Til þess að njóta 35% endurgreiðslu þurfa verkefni að auki að uppfylla eftirfarandi þrjú skilyrði:
- Að kostnaður sem fellur til hér á landi við framleiðsluna sé að lágmarki 350 milljónir króna.

- Að tökudagar vegna verkefnisins (e. principal photography) séu að
lágmarki 30, þó þannig að heimilt sé að telja daga við eftirvinnslu (e. post production) inni í þeim dagafjölda. Samtala heilla starfsdaga við tökur og eftirvinnslu skulu því samtals vera að lágmarki 30, þó þannig að tökudagar verði ekki færri en 10.

- Að fjöldi starfsmanna þeirra sem komi með beinum hætti að framleiðslunni hérlendis verði að lágmarki 50. Þar er miðað við heilan starfsdag hvers þeirra 50 sem til eru nefndir og heimilt er að telja mæði launþega og verktaka við framleiðsluna. Við talningu á heilum starfsdegi er vísað til 8 stunda vinnudags og því er heimilt að telja 50 starfsdaga sem vinnuframlag fleiri einstaklinga, þó hver þeirra vinni skemmri tíma.
Endurgreiðslur eiga ekki við um auglýsinga- og fréttatengt efni, stuttmyndir, upptökur af íþróttaviðburðum og skemmtunum, efni sem fyrst og fremst er ætlað til kynningar á tiltekinni vöru eða þjónustu, svo og framleiðsla efnis sem fyrst og fremst er ætlað til sýninga í eigin dreifikerfi.
Endurgreiðslukerfið eru á grundvelli laga nr. 43/1999 með síðari breytingum og reglugerð nr. 450/2017. Það heyrir undir menningar- og viðskiptaráðuneyti sem hefur falið Kvikmyndamiðstöð Íslands umsjón þess en Íslandsstofu að kynna Ísland sem tökustað gagnvart erlendum aðilum.
Hér má nálgast merki menningar- og viðskiptaráðuneytis.

Hlutaendurgreiðslur

Heimilt er að sækja um sérstaka endurgreiðslu að hluta í samræmi við reglugerð um breytingu á reglugerð nr. 450/2017, um tímabundnar endurgreiðslur vegna kvikmyndagerðar á Íslandi, þó að framleiðslu sé ekki að öllu leyti lokið.

Þetta á við um verkefni sem hafa fengið vilyrði og að lágmarki 50% af kostnaði viðkomandi verkefnis, sem fellur til á Íslandi og er endurgreiðsluhæfur framleiðslukostnaður samkvæmt lögum nr. 43/1999, miðað við uppfærða heildarkostnaðaráætlun, er þegar fram kominn. Slíkur hluti endurgreiðslu kemur að fullu til frádráttar fullri endurgreiðslu við lokauppgjör viðkomandi verkefnis. Sömu kröfur eru gerðar til endurgreiðslu á grundvelli þessa ákvæðis og fram koma í 6. gr., eftir því sem við á og á einungis við um kostnað við framleiðslu sem hefur verið greiddur og fellur til á Íslandi. Sérstök skilyrði hlutaendurgreiðslu eru að umsækjandi skili greinargerð um framleiðslustöðu verkefnisins þar sem eftirfarandi upplýsingar koma fram:

Gera þarf skýrlega grein fyrir hvaða kostnaðarþættir innan uppfærðrar heildarkostnaðaráætlunar verkefnis mynda stofn til útreiknings hlutaendurgreiðslu.

Gera þarf skýrlega grein fyrir þeim verkþáttum sem ekki eru fullunnir og þeim kostnaði sem ekki hefur verið greiddur innan uppfærðrar heildarkostnaðaráætlunar verkefnis.

Gögn vegna umsóknar um hlutaendurgreiðslu sýni með skýrum hætti stöðu verkefnis á umsóknardegi, þar með talin uppfærð kostnaðar, fjármögnunar- og framleiðsluáætlun.

Kostnaðarþættir, sem mynda stofn til útreiknings hlutaendurgreiðslu, eiga einungis við um kostnað við framleiðslu sem hefur verið greiddur og fellur til á Íslandi.

Kostnaðarþættir, sem mynda stofn til útreiknings hlutaendurgreiðslu, skulu sundurliðaðir og sérmerktir til staðfestingar á því að lágmark 50% af kostnaði verkefnis, sem falla til á Íslandi og er endurgreiðsluhæfur framleiðslukostnaður samkvæmt lögum nr. 43/1999, sé þegar fram kominn.

Hreyfingayfirlit kostnaðaruppgjörs (á pdf- eða xls-formi) úr skráningarkerfi bókhalds verkefnis. Yfirlitið sýni hreyfingar að baki samsvarandi liðum í kostnaðaráætlun og niðurstöðutölum kostnaðaruppgjörs þar sem samtala bókhaldshreyfinga stemmir við stofn til hlutaendurgreiðslu.

Hér má sjá leiðbeiningar um hvernig svara skuli á umsóknareyðublaði um útborgun þegar um hluta endurgreiðslur er að ræða (PDF).

Meðferð umsókna

Þriggja manna nefnd er skipuð til þess að meta umsóknir um endurgreiðslur og hefur hún aðsetur hjá Kvikmyndamiðstöð Íslands. Telst nefndin veitingarvald í skilningi reglugerðar vegna kvikmyndagerðar á Íslandi.

Menningar- og viðskiptaráðuneyti tilnefnir formann. Fjármála- og efnahagsráðuneytið og mennta- og menningarmálaráðuneytið tilnefnir sitthvorn nefndarmann. Í nefndinni eiga sæti:

Næsti fundur endurgreiðslunefndar er 31. janúar 2024.

Umsóknir þurfa að berast að minnsta kosti fjórum virkum dögum fyrir fund.

Aðalmenn:
Þóra Hallgrímsdóttir, skipuð formaður án tilnefningar.
Hildur Jörundsdóttir, tilnefnd af mennta- og menningarmálaráðuneyti.
Þorsteinn Júlíus Árnason, tilnefnd af fjármála og efnahagsráðuneyti.

Varamenn:
Brynhildur Kr. Aðalsteinsdóttir, tilnefnd af fjármála- og efnahagsráðuneyti.

Erindum má koma til nefndar um endurgreiðslur með tölvupósti á netfangið: endurgreidslur@kvikmyndamidstod.is