Dagskrá Bransadaga á Stockfish
Kvikmyndahátíðin Stockfish fer fram í níunda sinn 23. mars - 2. apríl í Reykjavík.
Á hátíðinni, líkt og fyrri ár, fara fram Bransadagar, þar sem fagfólki í íslenskri og erlendri kvikmyndagerð gefst tækifæri til að eiga samtal og mynda gagnleg sambönd sín á milli.
Í ár býður Stockfish býður upp á dagskrá sem nefnist „Bransi í brennidepli“, sem er nýjung á hátíðinni.
Í ár er Slóvakía í brennidepli og í tilefni þess mun sendinefnd þaðan, skipuð kvikmyndagerðarfólki og fulltrúum sjóða, sækja hátíðina heim. Einnig verður boðið upp á hliðardagskrá með sérsýningum á slóvakískum kvikmyndum sem unnin er í samstarfi við Kino Usmev, Bíó Paradís og slóvakísku kvikmyndastofnunina.
Auk þess fer á Bransadögum fram kynning á verkum í vinnslu, með stuðningi frá Kvikmyndamiðstöð Íslands, og viðburður þar sem farið er yfir helstu fjármögnunarmöguleika kvikmynda og sjónvarpsefnis á Íslandi.