Leynilögga heimsfrumsýnd í Locarno
Leynilögga eftir Hannes Þór Halldórsson var heimsfrumsýnd þann 10. ágúst á kvikmyndahátíðinni í Locarno. Uppselt var á myndina og hlutu aðstandendur myndarinnar standandi lófatak við lok sýningar. Kvikmyndin var valin í aðalkeppni hátíðarinnar þar sem keppt er um Gyllta hlébarðann eða Pardo d‘Oro, ein virtustu kvikmyndaverðlaun sem veitt eru ár hvert.
Í kjölfar frumsýningarinnar hafa fyrstu dómarnir litið dagsins ljós m.a. frá Screen Daily, Cineuropa og ICS (International Cinephile society).
Leynilögga fyrsta leikna kvikmyndin sem Hannes Þór leikstýrir og fjallar myndin um grjótharða ofurlöggu sem er í baráttu við sjálfan sig á sama tíma og hann berst við hættulegustu glæpamenn landsins.
„Að frumsýna myndina á virtri hátíð eins og Locarno er sérstakur heiður fyrir okkur öll sem komum að myndinni. Þar sem lítið hefur verið um kvikmyndahátíðir vegna Covid er óvanalega mikill fjöldi mynda sem reynir að komast að á hátíðum og því er það mikil viðurkenning að vera valin.“ segir Lilja Ósk Snorradóttir framleiðandi hjá Pegasus.
„Þetta er búið að vera mjög krefjandi og skemmtilegt ferli með frábæru fólki. Ég er enn að átta mig á að myndin hafi verið valin inn á hátíðina og hlakka til að sýna hana þar. Er samt enn spenntari fyrir því að sýna hana hér heima sem verður núna í lok ágúst“ segir Hannes Þór Halldórsson leikstjóri.
Kvikmyndin er skrifuð af Nínu Petersen, Sverri Þór Sverrissyni og Hannesi Þór Halldórssyni. Myndin er framleidd af Lilju Ósk Snorradóttur fyrir Pegasus Pictures og með aðalhlutverk fara Auðunn Blöndal, Egill Einarsson, Steinunn Ólína Þorsteinsdóttir, Vivian Ólafsdóttir, Sverrir Þór Sverrisson og Björn Hlynur Haraldsson.
Nánari upplýsingar um kvikmyndahátíðina í Locarno má finna á heimasíðu hátíðarinnar.