Óséðar perlur og glænýjar íslenskar heimildamyndir á Skjaldborg
Skjaldborgarhátíðin fer fram á Patreksfirði um hvítasunnuhelgina 6.-9. júní, þar sem frumsýndar verða 5 íslenskar heimildamyndir í fullri lengd og 8 íslenskar heimildastuttmyndir, auk kynningar á verkum í vinnslu.
Meðal mynda sem sýndar eru á hátíðinni og hafa verið styrktar af Kvikmyndamiðstöð eru eftirfarandi:
Paradís Amatörsins
Janus Bragi Jakobsson
https://www.youtube.com/watch?v=vaK_k7u52Jo
Á Íslandi, í Paradís Amatörsins, voru alltaf til menn sem tóku upp viðburði í fjölskyldum eða bæjarfélagi – áður en nokkur vissi almennilega til hvers. Í dag eru það ekki lengur viðburðir sem eru skrásettir, heldur sjálfsmyndir sem eru skapaðar. Og allt þetta efni endar á YouTube. Myndin byggir á efni frá mönnum úr fjórum kynslóðum sem allir hafa deilt lífi sínu á YouTube. Fyrrverandi forstjórinn Guðfinnur hefur myndað fjölskyldu sína í áratugi. Leigubílstjórinn Kári heldur í óperudrauma sína með aríusöng í íbúðinni í Hafnarfirði. Einstæðingurinn Sævar opinberar sig í leit að alvöru tengingu við aðra. Og síðast en ekki síst áhrifavaldurinn Karl Emil sem týnist í leit að sjálfum sér. Leikstjórinn Janus Bragi fylgir þessum fjórum mönnum eftir og rýnir í hvernig þeir, með deilingu eigin myndefnis, spegla það sem skiptir mestu í lífinu...
Myndin hlaut framleiðslustyrk 2023 (kr. 16.000.000), þróunarstyrk 2022 (kr. 3.000.000) og þróunarstyrkur 2021 (kr. 1.750.000).
Frá ómi til hljóms - tónlistin á dögum Sveins Þórarinssonar amtskrifara
Ásdís Thoroddsen
https://vimeo.com/1075065286
Sveinn Þórarinsson amtskrifari (1821-1868) hélt dagbók frá unglingsaldri þar til hann lést. Dagbókarfærslur hans, sem lúta að tónlist eru leiðarstef í kvikmyndinni „Frá ómi til hljóms,“ sem fjallar um breytinguna sem varð í íslensku tónlistarlífi á 19. öld þegar ný hljóðfæri, nýjar tóntegundir og sönglög bárust frá meginlandinu. Myndin hlaut framleiðslustyrk 2024 (kr. 16.500.000) og handritsstyrk 2022 (kr. 600.000).
Bóndinn og verksmiðjan
Barði Guðmundsson og Hrafnhildur Gunnarsdóttir
Hross á bæ í Hvalfirði veikjast eitt af öðru af völdum meintrar flúormengunar frá álverksmiðju í næsta nágrenni. Bóndinn á bænum mætir skilnings- og afskiptaleysi stjórnvalda og er sjálfur sagður bera ábyrgðina. Bóndinn leitar allra leiða til að komast að hinu sanna í málinu en á við ofurefli að etja.
Myndin hlaut framleiðslustyrk 2019 (kr. 13.000.000) og þróunarstyrk 2018 (kr. 1.200.000).
Musteri minninga
Erlendur Sveinsson
Jón í Myndbandavinnslunni sérhæfir sig í að færa gamlar upptökur í stafrænt form og þar með halda lífi í minningum Íslendinga sem annars gætu glatast. Skyggnst er inn í persónulegar sögur Jóns og viðskiptavina hans, og þróunina og tæknina sem liggur að baki varðveislu minninga í hinum ýmsu formum hreyfimyndarinnar.
Myndin hlaut framleiðslustyrk 2024 (kr. 4.500.000).
Hashtag t(o)úr
Margrét Seema Takyar
Halla Ólafsdóttir og Amanda Apetrea eru verðlaunadanshöfundar sem vinna oft sem tvíeykið Beauty & Beast. Í verkum sínum ögra þær bæði sýnilegum og ósýnilegum reglum feðraveldisins. Þegar #metoo brýst út á sama tíma og stóri túrinn þeirra virðist lífið loks vera endurspegla listina. Úti er ævintýri - eða?
Myndin hlaut þróunarstyrk 2023 (kr. 4.300.000).
Heiðursgestur og fjölbreyttir viðburðir
Heiðursgestur Skjaldborgar í ár er Alessandra Celesia, ítalskur leikstjóri sem hefur stundað heimildamyndagerð á Norður-Írlandi sem og í heimalandinu Ítalíu. Alessandra heldur fyrirlestur á hátíðinni, að lokinni sýningu á verðlaunamynd hennar The Flats (Íbúðirnar) laugardaginn 7. júní. Myndin hefur verið sýnd á fjölda hátíða og hlaut meðal annars aðalverðlaun CPH:DOX 2024 og IFTA, írsku kvikmyndaakademíuverðlaunin, fyrir bestu heimildamynd ársins.
Á hátíðinni stendur Kvikmyndasafn Íslands fyrir sýningu á kvikmynd Ósvalds Knudsens Surtur fer sunnan á hátíðinni, þar sem kvikmyndagerðarmaðurinn merki festi á filmu eldsumbrot í Vestmannaeyjum 1963 undir tónlist Magnúsar Blöndal. Auk þess sýnir Kvikmyndasafnið filmur Garðars Ó. Jóhannessonar sem kvikmyndaði daglegt líf á Patreksfirði 1948-1953. Þær hafa sennilega aldrei verið sýndar opinberlega og því um að ræða einstakt tækifæri til að virða fyrir sér mannlíf á miklum uppgangstímum á Patreksfirði.
Auk kvikmyndasýninga verður boðið upp á fjölbreytta viðburði, svo sem skrúðgöngu, plokkfiskveislu og limbókeppni.
Hægt er að kynna sér dagskrá hátíðarinnar á vef Skjaldborgar .