Reykjavík Fusion keppir um verðlaun á Canneseries

Sjónvarpsþáttaröðin Reykjavík Fusion, með Ólafi Darra og Heru Hilmarsdóttur í aðalhlutverkum, verður heimsfrumsýnd á sjónvarpshátíðinni Canneseries í Frakklandi.

Þáttaröðin tekur þátt í keppnisflokki hátíðarinnar, ásamt sjö öðrum þáttaröðum. Höfundur og helsti hugmyndamiður Reykjavík Fusion er Hörður Rúnarsson og Birkir Blær Ingólfsson er meðhöfundur og hugmyndasmiður. Leikstjórar eru Samúel Bjarki Pétursson og Gunnar Páll Ólafsson

Ólafur Darri leikur í þáttunum hæfileikaríkan matreiðslumeistara sem reynir að koma lífi sínu á réttan kjöl eftir fangelsisvist. Hera Hilmarsdóttir leikur rekstrarstjóra veitingastaðarins sem nýtir sér einfeldni matreiðslumeistarans til að vinna að eigin hagsmunum. Saman sökkva þau dýpra og dýpra í vef glæpa í undirheimum Reykjavíkur þar sem hvert rangt spor getur reynst dýrkeypt.

Með önnur hlutverk fara Lára Jóhanna Jónsdóttir, Þröstur Leó Gunnarsson, Molly Mitchell, Iðunn Ösp Hlynsdóttir, Unnur Birna Jónsdóttir Backmann, Guðjón Davíð Karlsson og Atli Óskar Fjalarsson.

Þáttaröðin er framleidd af íslenska framleiðslufyrirtækinu ACT4 í samstarfi við ARTE FRANCE, Helsinki -filmi Oy, Wild Sheep Content og Skot Productions.