Samstarf milli Norðurlanda og Asíu eflt á Singapore Nordic Film Festival 2025 í Osló

Singapúr–Norræna kvikmyndahátíðin (SNFF) verður haldin í fyrsta sinn í Cinemateket í Ósló dagana 13.–14. september 2025. Hátíðin er helguð því að tengja saman kvikmyndageira og sjónarhorn Suðaustur-Asíu og Norðurlanda með kvikmyndasýningum, umræðum og tengslamyndunarviðburðum.

Laugardaginn 13. september 2025 verður haldin þriggja klukkustunda vinnustofa á hátíðinni (Film, Lah! Industry Workshop: Bridging Nordic-Asian Collaborations) þar sem lykilfólk úr kvikmyndaiðnaði Asíu og Norðurlanda kemur saman til að kanna nýjar leiðir til samframleiðslu, fjármögnunar og skapandi samstarfs.

Meðal þátttakenda eru Gísli Snær Erlingsson, forstöðumaður Kvikmyndamiðstöðvar Íslands, Melvin Ang, stofnandi og forstjóri mm2 Asia Holding Company, Meghan Beaton, forstöðumaður Norwegian Film Commission, og margir aðrir reyndir kvikmyndagerðarmenn og framleiðendur.

Dagskráin felur í sér framsöguerindi, pallborðsumræður og sérstaka kynningu á þróun gervigreindardrifinna kvikmyndaverkefna, þar á meðal SG60: AI Short Film Competition 2025, sem opið er norrænum kvikmyndagerðarmönnum. Einnig verða kynnt dæmi um árangursríkt samstarf milli svæðanna, með áherslu á möguleg framtíðarverkefni.