Stór íslenskur kvikmyndafókus í Les Arcs

Tuttugu íslensk kvikmyndaverk verða sýnd á íslenskum kvikmynda- og tónlistarfókus kvikmyndahátíðarinnar í Les Arcs í Frakklandi, 14.-21. desember 2024.

Tvær nýjar íslenskar kvikmyndir verða sýndar í aðaldagskrá hátíðarinnar. Kvikmyndin Ljósbrot, í leikstjórn Rúnars Rúnarssonar, keppir þar um verðlaun og Snerting, í leikstjórn Baltasars Kormáks, verður sýnd í hluta hátíðarinnar sem nefnist Oscars on Skis.

Tengsl hátíðarinnar við íslenska kvikmyndagerð hafa löngum verið sterk. Fjöldi íslenskra kvikmynda hafa verið sýndar á hátíðinni í gegnum tíðina og hlotið þar verðlaun, auk þess sem mörg íslensk verkefni í vinnslu hafa tekið þátt í bransahluta hennar sem nefnist Industry Village.

Eldri í bland við nýrri kvikmyndaverk verða hluti af fókusnum, 9 leiknar myndir í fullri lengd og 9 stuttmyndir.