Tilverur verður opnunarmynd RIFF
Tilverur, í leikstjórn Ninnu Pálmadóttur, verður opnunarmynd RIFF, alþjóðlegrar kvikmyndahátíðar í Reykjavík. Hátíðin hefst 28. september og stendur yfir til 8. október.
Myndin segir frá manni sem flyst tilneyddur til borgarinnar þegar ríkið tekur jörð hans yfir til virkjunarframkvæmda. Í borginni kynnist hann blaðbera, hinum 10 ára gamla Ara, sem markar upphafið að umbreytingum á lífi beggja.
Tilverur var heimsfrumsýnd á alþjóðlegu kvikmyndahátíðinni í Toronto og er fyrsta kvikmynd Ninnu Pálmadóttur í fullri lengd. Handritið skrifar Rúnar Rúnarsson.
Með aðalhlutverk fara Þröstur Leó Gunnarsson, Hermann Samúelsson, Anna Gunndís Guðmundsdóttir og Hjörtur Jóhann Jónsson.
Myndin verður tekin til almennra sýninga í Sambíóunum 29. september.