Verbúðin hlutskörpust á Eddunni
Edduverðlaunin voru afhent á hátíð Íslensku kvikmynda- og sjónvarpsakademíunnar sunnudaginn 19. mars.
Sjónvarpsþáttaröðin Verbúðin hlaut þar flest verðlaun, eða alls níu, þar á meðal sem besta leikna sjónvarpsefni ársins og fyrir besta handrit ársins. Aðalleikarar Verbúðarinnar, Gísli Örn Garðarsson og Nína Dögg Filippusdóttir, fengu að auki verðlaun fyrir frammistöðu sína.
Kvikmyndin Berdreymi, í leikstjórn Guðmundar Arnars Guðmundssonar, var valin kvikmynd ársins og Hlynur Pálmason, leikstjóri Volaða lands, var valinn leikstjóri ársins. Velkominn Árni, eftir Viktoríu Hermannsdóttur og Allan Sigurðsson, var valin heimildamynd ársins.
Laufey Guðjónsdóttir, fyrrverandi forstöðumaður Kvikmyndamiðstöðvar Íslands, var heiðruð á hátíðinni fyrir framlag sitt til kvikmyndageirans.
„Við vitum öll sem stöndum á kantinum hvað þarf mikið til að gera góða mynd og hvað mikil vinna er á bak við velgengni íslenskrar kvikmyndagerðar,“ sagði Laufey í ræðu sinni. „Það er bæði sköpunarkrafturinn sem þarf, það er fagmennskan, það er ótrúleg þrautseigja og þor. Síðan til að fíra í þessu öllu saman er mjög mikilvægt að treysta á stuðning stjórnvalda sem hafa svo sannarlega staðið við bak greinarinnar. Auðvitað viljum við öll mikið meira og öðruvísi og það allt, en það er frábært að eiga þennan trausta stuðning, án þess væri þetta ekki hægt. Það er líka sérstaklega ánægjulegt hvað Kvikmyndastefnan hefur styrkt stoðirnar enn fremur í kvikmyndanámi, kvikmyndalæsi og svo framvegis.“
Ágúst Guðmundsson fékk heiðursverðlaun Íslensku kvikmynda- og sjónvarpsakademíunnar fyrir framlag sitt til íslenskrar kvikmyndalistar.
Ágúst var lykilmaður í þeirri miklu sköpunarbylgju sem átti sér stað í íslenskri kvikmyndagerð á áttunda og níunda áratug síðustu aldar og hefur hann verið einn farsælasti kvikmyndaleikstjóri landsins. Í ræðu sinni fór hann yfir það sem hefur breyst síðan hann tók upp sína fyrstu mynd, Land og syni, árið 1979.
„Hvaða listgrein hefur blómstrað betur en einmitt kvikmyndagerðin á þessu tímabili. Kvikmyndagerðin hefur orðið stóriðja sem veltir milljörðum og er löngu hætt að vera baggi á ríkinu, hafi hún nokkurn tímann verið það. Þá eru ónefnd hin raunverulegu verðmæti; menningarverðmætin. Því ef við viljum halda áfram að tala íslensku þá verðum við að halda áfram að framleiða menningarefni á íslensku. Ekki síst alls kyns lifandi myndir fyrir kvikmyndahús, sjónvarp og alla aðra myndmiðla.“
Sýnt var frá verðlaunahátíðinni í beinni útsendingu á RÚV . Vinningshafar Eddunnar 2023 voru eftirfarandi:
Kvikmynd
Berdreymi
Leikstjórn
Hlynur Pálmason fyrir Volaða land
Handrit
Mikael Torfason, Björn Hlynur Haraldsson og Gísli Örn Garðarsson fyrir Verbúðina
Leikari í aðalhlutverki
Gísli Örn Garðarsson fyrir Verbúðina
Leikkona í aðalhlutverki
Nína Dögg Filippusdóttir fyrir Verbúðina
Leikari í aukahlutverki
Björn Thors fyrir Svar við bréfi Helgu
Leikkona í aukahlutverki
Anita Briem fyrir Svar við bréfi Helgu
Leikið sjónvarpsefni
Verbúðin
Heimildamynd
Velkominn Árni
Stuttmynd
Hreiður
Barna- og unglingaefni
Randalín og Mundi: Dagar í desember
Frétta- eða viðtalsþáttur
Kveikur
Íþróttaefni
Jón Arnór
Mannlífsþáttur
Leitin að upprunanum
Menningarþáttur
Evrópsku kvikmyndaverðlaunin
Skemmtiþáttur
Áramótaskaup 2022
Sjónvarpsmaður
Viktoría Hermannsdóttir
Brellur
Guðjón Jónsson (VFX Supervisor) Monopix, ShortCut, MPC, Union VFX og Filmgate fyrir Against the Ice
Búningar
Margrét Einarsdóttir og Rebekka Jónsdóttir fyrir Verbúðina
Gervi
Kristín Júlla Kristjánsdóttir fyrir Verbúðina
Tónlist
Herdís Stefánsdóttir og Kjartan Dagur Holm fyrir Verbúðina
Hljóð
Gunnar Árnason fyrir Skjálfta
Klipping
Kristján Loðmfjörð fyrir Verbúðina
Kvikmyndataka
Maria von Hausswolff fyrir Volaða land
Leikmynd
Atli Geir Grétarsson og Ólafur Jónasson fyrir Verbúðina
Upptöku- eða útsendingastjóri
Salóme Þorkelsdóttir fyrir Söngvakeppnina 2022
Heiðursverðlaun
Ágúst Guðmundsson