Nýr dagur í Eyjafirði

Stuttmyndin Nýr dagur í Eyjafirði er byggð á samnefndu ljóði eftir Halldór Laxness Halldórsson og hverfist um Aron, karlmann á fertugsaldri. Myndin er ljóðræn framsetning á fegurð og harmi og tilraunum söguhetjunnar til að fylla upp í
merkingarleysi og tómarúm með því að máta sig við staðalímyndir. Einlægni hefur vikið fyrir neysluhyggju og karlmannlegum klisjum og Aron er fangi lífernis sem þrengir að honum á allan hátt. Við fyrstu sýn virðist það passa honum vel, jafnvel of vel. Þegar betur er að gáð leynist hins vegar ýmislegt undir yfirborðinu. Áhorfendur fylgja söguhetjunni í gegnum rússíbanareið og sjá mismunandi augnablikum bregða fyrir. Sum eru merkingarþrungnari en önnur en saman mynda þau eina heild líkt og bitar í púsluspili. Ferðalagið endar upp í Eyjafirði þar sem yfirborðsmennskan fær að
víkja og lífið fær tilgang á ný.