26.10.2022

Berdreymi og Volaða landi vegnar vel á kvikmyndahátíðum

Sigurganga kvikmynda Hlyns Pálmasonar og Guðmundar Arnars Guðmundssonar, Volaða land og Berdreymi, heldur áfram á erlendum kvikmyndahátíðum. 

Berdreymi hlaut aðalverðlaun á kvikmyndahátíðinni í  La Roche-sur-Yon í Frakklandi, sem fram fór 17.-23. október.

Myndin hlaut um helgina einnig áhorfendaverðlaun á  alþjóðlegu kvikmyndahátíðinni í Ulaanbaatar (UBIFF ), sem haldin var í 14. skipti í ár í Mongólíu. Verðlaunin hlýtur sú mynd sem sýnd er í flokki alþjóðlegra kvikmynda á hátíðinni og fær hæstu meðaleinkunn í áhorfendakönnun. Hún keppti þar á móti 16 öðrum myndum frá 13 löndum, þar á meðal Triangle of Sadness eftir Ruben Östlund sem vann gullna pálmann í Cannes, og Alcarrás eftir Carla Simón sem vann Gullna björninn í Berlín.

^{Frá kvikmyndahátíðinni í Ulaanbatar í Mongólíu.}

Volaða land var var valin besta kvikmyndin á alþjóðlegu kvikmyndahátíðinni í Riga í Lettlandi (RIGAIFF) . Dómnefndin var einróma um valið og segir myndina vera marglaga þjóðsögu sem leikur sér að væntingum áhorfenda.

^{Frá Cine de Gáldar hátíðinni.}

Ingvar Sigurðsson, sem fer með eitt aðalhlutverka myndarinnar, hlaut svo verðlaun sem besti leikarinn á kvikmyndahátíðinni Cine de Gáldar á Spáni .

Sjá einnig:

• Volaða land og My Year of Dicks vinna til verðlauna í Chicago 
• Volaða land hlýtur sérstaka viðurkenningu á kvikmyndahátíð BFI og verðlaun í Ungverjalandi 
• Blær Hinriksson hlýtur verðlaun á ítalskri kvikmyndahátíð
  
• Volaða land verðlaunuð í San Sebastian